Top Stories

இசையமைப்பாளராகிய பாடகர்

நடிகனாக இருந்து பாடகனாக அவதாரம் எடுத்து மீண்டும் நடிகராகி இப்போது இசையமைப்பாளராகியிருக்கிறார் கிரிஷ். இந்த வருடத்தில் 2 படங்களுக்கு இசையமைக்கவுள்ளதாகவும் மேலதிக விபரங்கள் விரைவில் அறிவிக்கப்படும் எனவும் தனது ட்விட்டர் தளத்தில் பதிவிட்டிருக்கிறார்.

தொடங்கியது மாரி 2

கடந்த 2015 வெளிவந்த மாரி திரைப்படத்தின் இரண்டாம் பாகத்தின் படப்பிடிப்பு இன்று (22.01.2018) ஆரம்பமானது. தனுஷ்,சாய்பல்லவி,ரோபோசங்கர் நடிக்கவிருக்கும் இந்த மாரி-2 திரைப்படத்துக்கு யுவன்சங்கர் ராஜா இசையமைக்கிறார். இந்தப் படத்தில் ஒரு பாடலை இசைஞானி இளையராஜா பாடியுள்ளமையும் குறிப்பிடத்தக்கது.

தள்ளிப்போன நாச்சியார்

பாலா இயக்கத்தில் ஜோதிகா மற்றும் G.V.பிரகாஷ் நடிப்பில் வெளிவரவிருக்கும் ‘நாச்சியார்’ திரைப்படம் எதிர்வரும் பெப்ரவரி 9ஆம் திகதி திரைக்கு வரும் என படக்குழுவால் அறிவிக்கப்பட்டது, ஆனால் இப்போது படத்தின் போஸ்டர் குறித்து சில வேலைகள் முடிவடையாததன் காரணமாக வெளியீட்டுத் திகதி ஒரு வாரம் தள்ளிப்போடப்பட்டுள்ளது. எனவே திரைப்படம் பெப்ரவரி 16ஆம் திகதி திரையரங்குகளுக்கு வரும் என உறுதிசெய்யப்பட்டுள்ளது.

மீண்டும் இணையும் கௌதம் மேனன்  மாதவன் கூட்டணி

2001ஆம் ஆண்டு ‘மின்னலே’ படத்தின் மூலம் தமிழ் சினிமாவில் இயக்குனராக அறிமுகமானார் கௌதம் வாசுதேவ் மேனன். அப்படத்தில் நாயகனாக நடித்தவர் மாதவன். அந்தப் படம் வெளிவந்து கிட்டத்தட்ட 17 வருடங்கள் கழித்து மீண்டும் கௌதம் மேனன் இயக்கத்தில் மாதவன் நடிப்பதற்கான பேச்சுவார்த்தைகள் நடைபெற்று வருவதாக கூறப்படுகிறது. இப்படம் தமிழ், ஹிந்தி, ஆங்கிலம் என ஒரே நேரத்தில் மூன்று மொழிகளில் உருவாக்குவதற்கான வேலைகளும் நடைபெற்று வருகிறதாம். தற்போது விக்ரமின் துருவநட்சத்திரம் மற்றும் தனுஷின் ‘எனை நோக்கிப் பாயும் தோட்டா’ படங்களில் பிஸியாக கௌதம் மேனன் இருக்கிறார். அதேபோல் சற்குணம் இயக்கத்தில் உருவாகிவரும் இன்னும் பெயரிடப்படாத புதிய படமொன்றில் நடித்து வருகிறார்

நிமிர் முன்னோட்டம் Jan 08 இல்

உதயநிதி ஸ்டாலின் நடிப்பில் ப்ரியதர்ஷன் இயக்கத்தில் வெளியாகவிருக்கும் திரைப்படம் “நிமிர்” அண்மையில் தணிக்கைக்குழுவினால் இப்படத்துக்கு ‘U’ சான்றிதழ் வழங்கப்பட்டிருந்தது. படம் விரைவில் வெளியாகவுள்ள நிலையில் படத்துக்கான Trailer ஐ ஜனவரி 8ஆம் திகதி வெளியிடத் தீர்மானித்துள்ளதாக உதயநிதி ஸ்டாலின் தனது டிவீட்டர் பக்கத்தில் பதிவிட்டிருக்கின்றார்.

பொங்கலுக்கு ஸ்கெட்ச்

விக்ரம் நடிப்பில் வடசென்னையை மையப்படுத்தி உருவாகி இருக்கும் ‘ஸ்கெட்ச்’ திரைப்படம் தணிக்கைக் குழுவில் `யு/ஏ’ சான்றிதழை பெற்றுள்ளது. இதையடுத்து படம் பொங்கலை முன்னிட்டு வருகிற 12-ஆம் திகதியன்று வெளியாகும் என்று படக்குழு அறிவித்துள்ளது. `வாலு’ படத்தை இயக்கிய விஜய் சந்தர் இயக்கியிருக்கும் இந்த படத்தில் விக்ரம் ஜோடியாக தமன்னா நடித்திருக்கிறார். ஆர்.கே.சுரேஷ், சூரி, அருள்தாஸ், மலையாள நடிகர் ஹரீஷ், ஸ்ரீமன், மதுமிதா உட்பட பலரும் நடித்திருக்கும் இந்த படத்தில் நடிகை ஸ்ரீ பிரியங்கா முக்கிய வேடத்தில் நடித்திருக்கிறார். தமன் இசையில் ஏற்கனவே பாடல்கள் வெளியாகி வரவேற்பை பெற்றிருக்கும் நிலையில், படத்தின் இசை வெளியீட்டு விழா விரைவில் நடைபெற இருக்கிறது.