samanweb

நமீதாவிற்கு விரைவில் திருமணம்

தமிழ், தெலுங்கு, கன்னட மொழி படங்களில் நடித்து பிரபலமான நடிகை நமீதாவிற்கு நவம்பர் 24 ஆம் திகதி திருமணம் நடக்கவுள்ளது. குஜராத் மாநிலம் சூரத்தில் பிறந்த நமீதாவுக்கு தற்போது 36 வயதாகிறது. தெலுங்கில் அறிமுகமான நமீதா, தமிழில் விஜயகாந்த் ஜோடியாக ‘எங்கள் அண்ணா’ படம் மூலம் அறிமுகமானார். சரத்குமாருடன் ‘ஏய்’ படத்தில் நடித்து பிரபலமானார். தொடர்ந்து சத்தியராஜுடன் ‘இங்கிலிஷ்காரன்’, விஜய்யுடன் ‘அழகிய தமிழ் மகன்’, அஜித்துடன் ‘பில்லா’ உட்பட ஏராளமான படங்களில் கவர்ச்சி நாயகியாக நடித்தார். தற்போது அதிகப் படங்களில் நடிப்பதில்லை என்றாலும் நமீதாவுக்கு தனி ரசிகர்கள் கூட்டம் உள்ளது. தற்போது ‘பொட்டு’ என்ற படத்தில் நடித்து வருகிறார்.

பிரச்சினைகளைத் தெரிவிக்க பிரத்தியேக செயலியை அறிமுகப்படுத்தினார் கமல்

மக்களின் கருத்துக்களையும் பிரச்சினைகளையும் தெரிவிப்பதற்காக ‘மையம் விசில்’ ‘MAIAMWHISTLE’ என்ற பிரத்தியேக செயலியை தனது பிறந்த நாளான இன்று (07) நடிகர் கமல் ஹாசன் சென்னையில் அறிமுகப்படுத்தியுள்ளார். தமிழகத்தின் முன்னேற்றத்திற்காக இந்த செயலி அறிமுகப்படுத்தப்பட்டுள்ளதாக கமல் குறிப்பிட்டுள்ளார். மேலும், தாம் தமிழகம் முழுவதும் பயணம் செய்யத் திட்டமிட்டுள்ளதாகவும், தீயவை நடக்கும்போது குரல் கொடுக்க ‘மையம் விசில்’ செயலி பயன்படும் என்றும் தெரிவித்துள்ளார். மேலும், மக்கள் தங்களது பிரச்சினைகள் பற்றி பேச #theditheerpomvaa, #maiamwhistle, #virtuouscycles என்ற ஹேஷ்டேக்குகளையும் அறிமுகம் செய்து வைத்துள்ளார். செயலியின் சோதனை தற்போது நடந்து வருவதாகவும், ஜனவரி மாதம் பயன்பாட்டிற்கு வரும் எனவும் கமல் குறிப்பிட்டுள்ளார்.